افصل شوية مش على طول

كنت أقرأ كتاب في العربيّة وانا مستنية جوزي يشتري حاجات، وعلى غير العادة الكتاب كان رواية.

فبالرغم من حبي للروايات إلا إني مش بقرأها كتير وبروح أكتر للكتب العلمية أو الاجتماعية بحس ان الروايات عاملة زي المسلسلات مشوقة وتاخدك بعيد كده عن الدنيا وممكن تشدك انك تخلصها في يوم والا يومين …
المهم لاقيت خبطة على العربية، بدور أشوف فيه ايه لاقيت عربيات إسعاف وبوليس وراجل دمه سايح و حاجات كتير كده تخض وانا و لا كأني كنت هنا!!!
وأقول ياربي دي شكلها كانت حادثة جامدة !! طب أنا كنت فين إزاي محستش !!

أدركت ساعتها ليه أنا ببعد عن الروايات بالرغم من حبي ليها علشان هي هي المسلسلات بس لمحبي القراءة حاجة جميلة تاخدك بعيييد وتشدك وتفصلك عن الواقع حتى لو كانت كتير بتصور الواقع بس بتفصلك عن أي مشكلة حواليك..آه هو الموضوع ده كويس ساعات بس مينفعش تبقى دايماً في حالة التغييب دي.
اختار كتب كتير بتتكلم عن مواضيع زي السياسة والأدب والفن والدين والتاريخ وأي نوع من انواع العلوم تحبه واقرأها واستريح شوية مع رواية شيقة تسليك وتهديك،مش كله مسلسلات ومش كله روايات، انت مسؤول عن تنمية قدراتك ودماغك .