الصحة والجمال

بصراحة مش أنا

-لو سمحت أنا بعد ما اتجوزت شكلي اتغير وتخنت ،فنفسيتي تعبت، فعايزة أرجع زي زمان.
-زمان امتى كده يا فندم؟؟؟
-مش عارفة!! أهو أنا كده طول عمري معترضة على خلقتي!

-ولا يهمك يا فندم إحنا حنمسح معالمك كلها ونظبطك بعون الله!

إحنا نعمل نظام غذائي ونوديكي الجيم ولو حضرتك بتتخنقي من الدايت متقلقيش نقصّلك معدتك ويبقى كله تمام.

وشعري؟؟؟

-ولا يهمك نعمل اكستنشن ونضربه ألوان الطيف حيليق عليكي أوي بعد البرونزاج اللي حنعمله لكل جسمك أصل الأبيض مش لايق عليكي خالص.

-طب حواجبي؟؟

-دول الحقيقة مرضناش نقولك وحشين جدّا ! دول بقى حنشيلهم ونشتغل على نظافة، نعمل تاتو حواجب مدوّر كده شبه قوس قزح علشان يليق مع الحلزونات اللي حنعملهالك في شعرك .

-طب مناخيري حلوة؟؟

-لا حلوة إيه دي شبه البطاطس المكعورة!!! إحنا حنقصّها من الجناب كده وحنمطها لقدام شوية بس وعد حتعجبك أوي!

-بؤي بقى ده عقدة حياتي لما بتصور وأجي أعمل وضعية بوز البطة مش بيبان في الصورة.

-عندك حق يا فندم إحنا حننفخه
كده علشان يبان ده صغير أوي أوي..و إيه ده.. ده منظر سنان لااااا !
إحنا حنعملهم بيانو نبيض بقى علشان لما تعملي إعلانات معجون الأسنان و نبرد زي ترامب كده علشان أهم حاجة الإبتسامة… مفهوش هزار الموضوع ده بالذات.

-عايزاه حلو كده و معووج تكة زي اليسا .

-اطمني يا فندم أكيد حيتعوج من اللي حنهببه في وش حضرتك.

-وكمان لما بضحك مناخيري بتكشكش شوية كده و عنيا كمان.

-مينفعش أبداً أبداً لازم يبقى وشك مفرود كأنك عاملاه بالمكواه حنحقنه لحضرتك حاضر وبالمرة حقنتين كده في الجفن لزوم الأي شادوو !
وشوية حقن كده لتجديد الخلايا والجلد والنضارة بقى والذي منه!

-طب عايزة نغزات في خدي علشان بتطلع حلوة.

-غرزة بسيطة في الخد.. محلولة اطمني.

-ممممم طب الفروة بقى عايزة حل للموضوع ده!! قرف وكده.

-طبعا ليزر حيحل كل حاجة.

-لما أخس وشي حيخس هو كمان؟؟

-طبعا بس احنا حننفخه اطمني

-طب و …. ختخس برضه .

-هههه يا فندم حنظبطها أحسن من كيم كارديشيان.. بسيطة.
وكمان لما حتخسي فدراعاتك حتدلدل كده شوية بس احنا حنقص ونلزق بقى علشان المنظر العام ميبقاش شكل الكياس الفاضية.

-طب و رجليا !

-تحبي نغيرهم ؟؟

-لا لا ضوافري كده….

حنركب ضوافر و نرسم عليهم ورد ونلزق فصوص وكله كله.

-طب علامة تطعيم اللي في كتفي من عمر السنة دي بايخة مع البلوزات المقطعة من الكتف ؟؟!!

-نشيل الحتة الوحشة دي خاالص يا فندم ونحط بدالها جلد حمار وحشي

-وبعد كل ده حنمكيجك ونركبلك رموش ولينسيز عين قطة
حتشوفي نفسك مش حتصدقي يا فندم أو بالأصح مش حتعرفي نفسك أساساً.

-تفتكري جوزي حينبسط ؟؟

-لا ينبسط ايه احنا حنغيره هو كمان؛ مهو حيشوفك ميعرفكيش فمفيش داعي منه خالص…نجيب واحد تاني أحسن منه!
بس المهم ان التغيير يكون نابع من جواكي !!!

اظهر المزيد

Noha Etanbouli

انا شوية حاجات ملخبطة على بعض حلوة على وحشة لذيذة على بايخة عاقلة على مجنونة. لمتابعتى من هنا

اترك تعليق

avatar
  Subscribe  
نبّهني عن
زر الذهاب إلى الأعلى
إغلاق