ريادة أعمال

الدليل السريع للـ CV الفظيع

8 نُقط وتكون في الـ Folder اللي نفسك فيه!

 

يُعتبر الـ CV دلوقتي هو وسيلة التقديم على الوظائف، بالإضافة إلى الـ Portfolio. لحد فترة قريبة، الـ CV كان مجرد كلمة ومش مفكوك لغزها. اتطورت الدنيا “والحياة بقيت سريعة سريعة” زي ما أستاذ رمضان بيقول.

لو عايز تخلي الـ CV أو السيرة الذاتية في المكان المظبوط، يعني في إيد الـ HR أو مسئول التوظيف وما تضيعش الـ CV بتاعك للأبد وتكون في ملف الـ Rejected وبكل جدارة! أنا جايلك من المستقبل عشان ألحقك! تعالوا نشوف النُقط الجاية مع بعض.

 

  1. نخُش في الموضوع على طول!

 

 

 

 

 

 

 “بما إني حطيت في إعلان الوظيفة اللي محتاجه من موظفين، إنهم يبعتوا الـ CV يبقى أكيد مش مستنيك تعرفني إن اللي مبعوت في الميل CV! ولا لما أفتح الـ Word Document ألاقيك كاتب CV. مش كدة يا مؤمن يعني!”

 

 

  1. معك 30 ثانية من وقت ما يبدأ بالكلام!

لما يكون قدامك وقت محدد توصل فيه فكرتك، فـ بتحاول تخطط، تحضر، تنظم أفكارك بحيث توصل المطلوب في الوقت تمام. ده بالظبط إللي بيحصل مع الـ HR اللي بيشوف الـ CV. سيبك من الهري وخليك في صُلب الموضوع.

 

  1. ده CV مش كارت عيد ميلاد

 خليك التصميم simple. اللون الأسود زي ما بتكتب في أي ملف عادي جدا. إنما بقى نلاقي “الكهارب” كأنه فرح شعبي. ده غير كمية الألوان والحركات والذي منه؟! كدة إحنا بنلعب في منطقة تانية خالص يا معلم.

 

  1. متلازمة “أبو العربي”

لما بتزود Tasks أو شغل بتعمله في وظيفتك أو نشاط مشترك فيه، هيخلي الـ HR يوصله معنى من الإتنين: الأول يا سيدي إنك Overqualified على الوظيفة، وبالتالي هتتألش. الثاني بقى إنك مَيَاس وفوريجي وحاشي أي كلام في ملف!

  

  1. مُدة شغلك قد إيه؟!

عندك خبرات كتير من كذا شغلانة؟ حلو أوي الكلام ده. بس قولي اشتغلت في كل مكان إنت كتبته، قد إيه؟ لو هتسيب الموضوع سايح على بعضه، مش هيكون مؤشر خالص. مش فكرة إنك قديم زي عماد والسلام *بصوت عم محمد شرف* الله يرحمه.

 

  1. “اممم نشاط إجتماعي”

أي نشاط خيري، تطوعي، إجتماعي بيضيف ثقل للـ CV. ده بقى بيترجم لمجموعة مهارات وخبرات الـ HR بيقيسها على حسب احتياج الوظيفة. ضيف بقى كل أنشطتك بما لا يُخالف شرع الله، هاه! عشان ما تجيش تزود حاجات ولما تتسأل.. يبقى هاه! واخد بالك! *بصوت عادل إمام*.

 

  1. ضيف الـ Reference

كل ما تكون تفاصيلك في الـ CV واضحة، وفي صُلب الموضوع يبقى إحنا ماشيين على الطريق الصح تمامًا. الله عليك بقى لما تزود الـ Reference في كل وظيفة/نشاط شاركت فيه. والـ Reference هو المدير/الـTeam leader اللي كنت بتشتغل معاه/ها. علشان ماحدش ينخرب ورانا!

 

  1. Only Gad can judge me

 

ما تبقاش صارف ومكلف، وعامل Template وحركات، وفي الآخر يكون في misspelling سواء عربي أو إنجلش. وخليك فاكر الحرف الواحد في مكان مش مكانه، يقلب الدنيا كلها.. يوقف القاعد.. ويقعد الواقف!

ها عملتم كام حاجة من دي قبل كدة في الـ CV بتاعكم؟!

الوسوم

اترك تعليق

avatar
  Subscribe  
نبّهني عن
زر الذهاب إلى الأعلى
إغلاق
إغلاق